لەیلا قاسم؛ سیمبولی خۆڕاگری و مەشخەڵی ئازادیی ژنانی کوردستان
ئەمڕۆ بە شانازی و شکۆوە یادی کچە کوردێکی بوێر و تێکۆشەر دەکەینەوە، کە بە خوێنی خۆی مێژوویەکی پڕ لە سەروەری بۆ ژنی کورد نووسییەوە.
لەیلا قاسم، لە لاپەڕەکانی مێژوودا بۆتە قوتابخانەیەک بۆ فێربوونی وانەکانی نیشتمانپەروەری، کۆڵنەدان و ڕووبەڕووبوونەوەی ستەم.
لەیلا قاسم لەو سەردەمەدا کە ڕژێمی داگیرکەر دەیویست ئیرادەی گەلەکەمان بشکێنێت، بە سەرێکی بەرزەوە بەرەو سێدارە هەنگاوی نا و سەلماندی کە ژنانی کوردستان نەک هەر بەشێکی دانەبڕاون لە خەباتی ڕزگاریخوازی، بەڵکو پێشەنگ و بڕبڕەی پشتی ئەو تێکۆشانەن. ئەو بە گۆرانی "ڕەقیب"ەوە پێشوازی لە مەرگ کرد، بۆ ئەوەی نەوەکانی دوای خۆی بە ئازادی بژین.
ئێمە وەک فێدراسیۆنی ژنانی دیاسپۆرای کوردستانی، لە کاتێکدا یادی ئەم قارەمانە نەتەوەییە دەکەینەوە، دوپاتی دەکەینەوە کە:
-ڕێبازەکەی بەردەوامە: خەباتی لەیلا قاسم بۆ ئازادی و یەکسانی، ئیلهامبەخشی هەموو ئەو ژنە کوردانەیە کە لە دیاسپۆرا و دووری نیشتمان کار بۆ ناساندنی دۆزی ڕەوای گەلەکەمان دەکەن.
پاراستنی شوناس: وەک ژنانی دیاسپۆرا، ئەرکی سەرشانمانە کچانی نەوەی نوێ لەسەر بیروباوەڕی لەیلا قاسم پەروەردە بکەین بۆ ئەوەی هەرگیز ناسنامە و مێژووی پڕ لە قوربانی خۆیان لەیاد نەکەن.
- بەردەوامی تێکۆشان: لەیلا قاسم بە ئێمەی وت کە جەستە دەکرێت زیندانی بکرێت، بەڵام بیروباوەڕی ئازادیخوازی هەرگیز کۆتایی نایەت.
لەیلا قاسم تەنیا شەهیدی کوردستان نییە، بەڵکو ناسنامەی ژنی کوردی ئازادیخوازە لە ئاستی جیهاندا.
سڵاو لە گیانی پاکی لەیلا قاسم و سەرجەم شەهیدانی ڕێگای ڕزگاریی کوردستان.
نەمری و سەربەرزی بۆ شەهید لەیلا قاسم و هەموو ژنە تێکۆشەرەکانی کورد.
فێدراسیۆنی ژنانی دیاسپۆرای کوردستانی
١٢ی ئایاری ٢٠٢٦