ڕۆژی هەینی، ٢٣ی تشرینی یەکەمی ٢٠٢٦، لە میانی جەژنی کەلتووریی مێریراستی (Merirastin Kulttuurijuhla) لە شاری هێلسینکی پایتەختی فینلەندا، فێدراسیۆنی ژنانی دیاسپۆرای کوردستانی بە سەرپەرشتیی خاتوو شیرین زەکی، سەرۆکی فێدراسیۆن، و بەشداریی چنور قادری و ئەندامانی دیکەی فێدراسیۆنەکە، چالاکییەکی کەلتووری و مێژوویی بەرچاویان ئەنجام دا. لەم چالاکییەدا، خاتوو میدیا قامشلو (موریدە عوسمان)، بەرپرسی کۆمیتەی فینلەندای فێدراسیۆنی ژنانی دیاسپۆرای کوردستانی، بە جلوبەرگی ڕەسەنی کوردییەوە دەرکەوت و بە دەستەکانی خۆی نەخشەی چوار پارچەی کوردستانی گەورەی دروست کردبوو کە ناوی تەواوی شارەکانی تێدا نەخشێندرابوو. میدیا قامشلو دەربارەی کارەکەی ڕایگەیاند: «من بێ نیشتمان لەدایکبووم و زۆر بەباشی دەزانم بێ نیشتمانبوون واتای چییە، بەڵام دەمویست نەخشەی نیشتمانەکەم، کوردستان، بە دەستەکانی خۆم بکێشم... بە هەموو هەست و خۆشەویستییەکەمەوە بۆ گەل و نیشتمانەکەم.» لە تەنیشت نەخشەکەوە، هاوکێشەیەکی مێژوویی خسترابووە ڕوو: «٢ + ٢ = ١؛ ئەم هاوکێشەیە تەنها بۆ کورد ڕاستە، چونکە کوردستان کراوە بە چوار پارچە، دوو بەش لەگەڵ دوو بەش دەبێتە یەک — کوردستان!». جگە لە پێشکەشکردنی خواردنی ڕەسەنی کوردی، میدیا قامشلو بۆ ماوەی نزیکەی نیو کاتژمێر بە زمانی فینلەندی وتارێکی تێروتەسەلی مێژوویی بۆ جەماوەری ئامادەبوو لە کەلتوور و نەتەوە جیاوازەکان پێشکەش کرد و تیشکی خستە سەر مێژووی کوردستان، ڕیشەی گەلی کورد و ناسنامەی نەتەوەیی. خاتوو میدیا ساڵانێکی زۆرە لە فینلەندا لە ڕێگەی ڕێکخراوە ناحکومییەکانەوە (NGO) لە بوارەکانی کەلتوور، هونەر، مێژوو، فێرکاریی زمانی کوردی و سەمای کوردییدا چالاکیی بەردەوامی هەیە و خزمەتێکی گەورە بە کۆمەڵگەی کوردی و دۆزی ڕەوای گەلی کورد لە دیاسپۆرا دەکات.