شـــــەڕڤان
دەریا خۆشناو
11/01/2026 .
شـــــەڕڤان
مێژوو گەواهی شـــکۆتانە،
ئێوە کچی کوردن، ئەوینداری ئازادیین
تەواری بەرزەفڕی کوێستانن
ســــەوداسەری سەربەستین.
*****
مەشخەڵی گەشی ڕێی ڕزگاریین
زادەی بڵێسە و ئاگرن، نەیاری تاریکیین،
لە کاتی کەوتنیشدا، باڵی سەرەوەری ئەگرن
بەرەو لوتکە، بۆ ئاسمانی بێ سنوور ئەفڕن.
******
شەڕڤانی کورد نامرن، ڕۆحی یاخین،
مەرگی ئێوە لەڕێ ی خاکە، و شەرەفمەندییە
سەفەری نەمریی لەساتی فڕیندا سەربەرزییە
بەپێوە مردن، بـێـبــەندوبەســتی پڕ شانازییە.
******
ئێوە داربەڕووی دێرینی نیشتیمانن
ڕەگتان لەناخی لەخاکدایە،
بەژنی لاولاون، پەل و پۆتان لەیەکدایە،
سنەوبەری هەردەم سەوزن
سیمای تەبایی، و بۆیەکگرتوویی ڕەمزن.
******
سێبەر نین، ئێوە خۆری ڕووناکی زەویین
شەڕڤان و پێشمەرگەن، لە دڵتان کڵپەی ئەوین
چاونەترس، و خۆڕاگرن، ئیرادەتان چیایە
بۆ خاک و وەتەن، گیان و ڕۆحتان فیدایە.
******
چەکی دەست و نیگاتان، وانەی تێکۆشانە،
بەرگریی تا سەرکەوتن، مژدەی بەرخودانە،
ورەتان پۆڵایینە و بەهێز و جەسارەتن،
سەنگین و ڕەسەنن، تاسەی ژین و حەسرەتن.
******
لە خۆشەویستی هەست و ڕاز و نیازن
لە میهرەبانی وەک دایک، باوەشی سۆز و نازن
وەکو دالیا خۆڕاگرن
وەکو شلێر ناسک و خۆڕسکن
لەبۆن و بەرامدا، عەنبەر و مسکن.
******
کچی کورد ئاسۆی ڕۆژئاوا و ڕۆژهەڵاتن
تەیـبــەت، و ڤیــان، و لەیلا، ن
دیرۆکی پڕ خەباتن
دەنیز و ژینــا، ن،
لە کاتی مەرگیشدا سروودی هەرمان،
بۆ گەردوون دەڵێنەوە
ئێوە ئەستێرەن لە هەر کوێ بن، دەدرەوشێنەوە.
******
✍🏼 دەریا خۆشناو
11.01.2026
……………………..
تێبینی:
دەنیز/ دەنیز عەفرینی- شەهیدی ڕۆژئاوا
ژینا/ ژینا ئەمینی- شەهیدی ڕۆژهەڵات
ڤیان/ ڤیان عەنتەر- شەهیدی ڕۆژئاوا
لەیلا/ لەیلا قاسم شەهیدی باشور
تەیبەت/ دایکە تەیبەت شەهیدی باکور